काठमाडौं । मंसिर १ गतेदेखि सुरु भएको एनपीएलका १८ वटा खेल सकिइसकेका छन् । पहिलो संस्करणको उपविजेता सुदुरपश्चिम रोयल्स प्लेअफमा पुग्ने पहिलो टिम बनिसकेको छ । हालसम्म खेलेको पाँचवटामा सबै खेल जित्ने एक्लो टिम बनेको छ सुदुरपश्चिम । १० अंक जोडिसकेको यो टिम अब्बल देखिएको छ । राष्ट्रिय टिमका भदपर्दा अलराउण्डर दिपेन्द्र सिंह ऐरी मार्की र कप्तान रहेको यो टिमलाई उपाधि दाबेदार मानिएको छ ।
अघिल्लो वर्षको विजेता जनकपुर बोल्ट्सलाई भने यसपटक झड्का लागेको छ । खेलेका चारवटै खेलमा पराजित भएको यो टिम समुह चरणबाटै बाहिरिने जोखिममा परेको छ । मार्की खेलाडी आसिफ शेख हुन् भने कप्तान अनिल शाहलाई बनाइएको छ । तर चौँथो खेल, सुदुरपश्चिमविरुद्ध विदेशी खेलाडी दक्षिण अफ्रिकाका वाइने पर्निललाई कप्तान बनाए पनि जित्न सकेन ।
लुम्बिनीका मार्की र क्याप्टेन नेपाली राष्ट्रिय टिमका समेत क्याप्टेन रोहित पौडेल हुन् । अघिल्लो वर्ष १ मात्र खेल जितेर अंक तालिकाको अन्तिममा रहेको यो टिमले यसपटक पाँचवटा खेल खेल्दा दुई वटा जितेको छ । कमजोर प्रदर्शन गरेको लुम्बिनी प्लेअफमा पुग्ने सम्भावना त छ तर ज्यादै न्यून ।

पोखरा एभेन्जर्सको अवस्था पनि दयनीय छ । चार खेल खेल्दा तीन वटामा पराजित यो टिमको नेतृत्व कुशल भुर्तेलले गरेका छन् । कप्तान भुर्तेल पछिल्ला दुई खेलमा लगातार गोल्डेन डकआउट भएका छन् । अब प्लेअफमा पुग्ने यो टिमलाई फलामको चिउरा चपाएसरह छ ।

चार खेल खेलेर तीन वटा हारेको छ कर्णाली याक्सले । सोमपाल कामी मार्की र कप्तान रहेको यो टिमले पनि यसपटक राम्रो प्रदर्शन गर्न सकेको छैन । अब बाँकी तीन खेल जित्न सकेको अवस्थामा भने प्लेअफमा पुग्ने छ ।
पाँच खेल खेल्दा दुईमा हार र तीनमा जित हात पारेको टिम हो काठमाडौ गोर्खाज । करण केसीको नेतृत्वमा रहेको यो टीमले प्लेअफको सम्भावनालाई कायमै राखेको छ । 
चितवन राइनोजले चार खेल खेलेर दुईमा जित हासिल गर्दै प्लेअफको सम्भावनालाई कायम राखेको छ । कुशल मल्लको कप्तानीमा रहेको यो टिम सन्तुलित छ । बाँकी तीन खेलमा नतिजा आफ्नो पक्षमा पार्न सके उपाधि होडमा कायमै रहनेछ ।
यो सिजन सशक्त टिमको रुपमा देखा परेको विराटनगर किंग्सले पाँच खेलमा चार वटा जितेर ८ अंक जोडिसकेको छ । सन्दिप लामिछाने कप्तान रहेको यो टिमले अब दुई खेल खेल्न बाँकी छ र कम्तिमा एक खेल जिते पनि प्लेअफमा पुग्ने बलियो सम्भावना छ ।