काठमाडौं । गैरआवासीय नेपाली संघ (एनआरएनए)ले संघको १२औँ महाधिवेशन ६ महिनाभित्र सम्पन्न गर्ने जनाएको छ । एनआरएनएको दुईपक्षबीच एकताको सहमति भएपछि आइतबार काठमाडौंमा पत्रकार सम्मेलन गर्दै एनआरएनएले गैरआवासीय नेपाली संघको १२औँ महाधिवेशन ढिलोमा सहमति भएको मितिले ६ महिनाभित्र सम्पन्न गर्ने जनाएको हो । उक्त मितिभित्र १२ औँ महाधिवेशन सम्पन्न गर्दा २०२५ मे ३–४ मा आयोजित एकताको महाधिवेशनबाट महेशकुमार श्रेष्ठको नेतृत्वमा बनेको समितिको कार्यकाललाई पनि मध्यनजर गर्दै, उक्त समितिको कार्यकाललाई पूर्ण कार्यकाल मानिने एनआरएनएले जनाएको छ । 

त्यस्तै १२औँ महाधिवेशन पारदर्शी एवं विश्वासयोग्य रूपमा सम्पन्न गर्नका लागि आगामी महाधिवेशनमा उमेदवार नहुने व्यक्तिहरू सम्मिलित गरी एक ११ सदस्यीय स्टेयरिङ कमिटी गठन गर्ने सहमति भएको छ । पत्रकार सम्मेलनमा संस्थापन अध्यक्ष डा उपेन्द्र महत्तोले एनआरएनएको विवादका कारण देश बाहिर रहेका ८० लाख नेपालीलाई बन्धक बनाउन नहुने बताए । उनले दुईपक्षले गल्ती महशुस गरेर एकता गर्नु निकै सकारात्मक भएकाले एनआरएनएलाई सवैको विश्वासको संस्था बनाएर अघि बढ्न आग्रह गरे । 

त्यस्तै एनआरएनएका अध्यक्ष डा. बद्री केसीले टुक्रिएको संस्थाको नेतृत्व गर्नु र एकता भएको संस्थाको नेतृत्व गर्नु फरक कुरा भएको बताए । उनले आफु निरन्तर संस्थालाई एकताबद्ध गर्न लागेको भन्दै आगामी दिनमा संस्थालाई थप बलियो बनाउदै लैजाने बताए ।

त्यस्तै एनआरएनएका अर्का अध्यक्ष महेश श्रेष्ठले २२ बर्ष पुरानो संस्थामा विवाद भएका कारण एनआरएनएको पदाधिकारी भन्न लाज लाग्ने अवस्था अव अन्त्य भएको धारणा राखे । उनले सवै पदाधिकारीहरुको निरन्तरको प्रयासका कारण एकताबद्ध हुन सफल भएको उल्लेख गरे । 

कार्यक्रममा प्रधानमन्त्री सुशीला कार्कीले सङ्कटका बेला एनआरएनएले गरेको सहयोगप्रति धन्यवाद दिँदै, यो एकता एक उदाहरण बनेको बताइन् ।  राजनीतिक दलहरुले पनि एनआरएनएबाट पाठ सिक्दै पदको पछि नलागेर एकजुट भएर अगाडि बढ्न आवश्यक रहेको उनले बताइन् । कार्कीले एनआरएनएको नागरिकतासम्बन्धी विषयमा आफूले सक्दो प्रयास गर्ने आश्वासन समेत दिएकी छिन् । 

एनआरएनएले असन्तुष्टि, मतभेद र मतभिन्नताहरू हरेक संस्थाको स्वाभाविक प्रक्रिया भएको र सबैलाई सहमति र संवादको माध्यमबाट समाधान गर्दै एकताको ऐतिहासिक अध्याय लेख्न सफल भएको जनाएको छ ।