काठमाडौँ । पूर्वराजा ज्ञानेन्द्र शाहले नेपालमा जन्मेर मात्र नेपाली हुन नसक्ने बताएका छन् । आफ्नो जन्मदिनको अवसरमा निर्मलनिवासमा पत्रकारहरूसँग कुराकानी गर्दै शाहले भने, ‘हामी नेपालभित्र हुनुपर्छ अनि हामी नेपाली हुन्छौँ ।’

उनले यो समय नेपाल र नेपालीका लागि प्रार्थना गर्ने समय भएको पनि बताएका छन् ।

उनले अहिलेको समय वर्षाको समय भएकाले यो बेला बाढी, पहिरो डुबानजस्ता समस्या हुनेमा सचेत गराए । उनले भने, ‘यो बेला पानीजन्य बिमारीहरू पनि हुन्छ । त्यसैले सबै दाजुभाइ दिदीबहिनीहरूलाई सतर्क रहन र विचार गरेर बस्नु मेरो आग्रह छ ।’

उनले आफूसँगै जन्मदिन पर्ने सबैलाई शुभकामना पनि दिए । पूर्वराजाले भने, ‘आज हाम्रो जस्तै कति जनाको शुभ दिन होला । वहाँहरूलाई मेरो तर्फबाट शुभकामना दिन चाहन्छु ।’

उनले आफ्नो जन्मदिनमा शुभकामना दिन आउनेलाई पनि धन्यवाद दिए ।