काठमाडौँ । काठमाडौँ महानगरपालिकाले आफ्ना सबै वडाहरूलाई कार्यालय सहयोगी सेवा करारमा राख्न बाटो खुला गरेको छ ।

महानगरले वडाको आकार अनुसार मासिक १ लाख रुपैयाँसम्म बजेट विनियोजन गर्दै आवश्यक कर्मचारी करारमा राख्न सबै वडा कार्यालयहरूलाई परिपत्र गरेको हो । महानगरको प्रशासन विभागले मंगलबार जारी गरेको परिपत्र अनुसार, आर्थिक वर्ष ०८२/०८३ को बजेट तथा कार्यक्रममा रहेको खर्च सङ्केत नं. २२४१३ अन्तर्गत वडामा कार्यालय सहयोगी सेवाका लागि बजेट छुट्याइएको हो ।

परिपत्रमा वडाको वर्गीकरण अनुसार बजेटको सीमा तोकिएको छ ।   साना वडाका लागि  प्रति महिना ७५ हजार रुपैयाँ, मझौला वडाका लागि प्रति महिना ८५ हजार रुपैयाँ र ठुला वडाका लागि  प्रति महिना १ लाख रुपैयाँ सीमा तोकिएको हो । यस बजेटबाट वडाहरूले आफ्नो आवश्यकता अनुसार इलेक्ट्रिसियन, माली, सूचना प्रविधि (प्राविधिक), ड्राइभर, हेल्पडेस्क कर्मचारी, सरसफाइकर्मी वा केन्द्रीय सहयोगीमध्येबाट करारमा राख्न सक्नेछन् ।

कर्मचारी राख्न ५ बुँदे मार्गदर्शन

महानगरले कर्मचारी करारमा राख्नका लागि ५ बुँदे मार्गदर्शन समेत जारी गरेको छ । प्रशासन विभागका प्रमुख ध्रुव कुमार काफ्ले जारी गरेको परिपत्रमा पहिलेदेखि कार्यरत कर्मचारीलाई नै निरन्तरता दिनुपर्ने भएमा उनको कार्यसम्पादन प्रतिवेदनको आधारमा वडा समितिले निर्णय गरी सम्झौता नवीकरण गर्नुपर्नेछ ।

यस्तै नयाँ कर्मचारी आवश्यक परेमा सेवा लिनका लागि आवेदन लिएर वडा समितिको निर्णय अनुसार करार सम्झौता गर्नुपर्नेछ ।

करारमा राखिने कर्मचारीको पारिश्रमिक श्रम ऐनले तोकेको न्यूनतम पारिश्रमिकभन्दा कम हुन नहुने उल्लेख छ । करार सेवाको प्रगति प्रतिवेदन प्रत्येक महिना एक प्रति वडामा र अर्को प्रति प्रशासन तथा वित्त विभागमा पठाउनुपर्ने कर्मचारीको दैनिक हाजिरी (डोर हाजिर) अनिवार्य गरी सोही आधारमा पारिश्रमिक भुक्तानी दिनुपर्नेछ ।