काठमाण्डाैँ । मनसुन सुरु भएदेखि काठमाडौँ उपत्यकासहित सशस्त्र प्रहरी बल नेपालले देशभर ४१ वटा स्थानमा मनसुन प्रतिकार्य अस्थायी बेश स्थापना गरेको छ । काठमाडौँ उपत्यकामा कोलमटेश्वर मन्दिर, धर्मस्थली, धापासी र ललितपुरको लेले तथा भक्तपुरको सानोठिमीमा मनसुन प्रतिकार्य वेश स्थापना गरेको हो ।

सशस्त्र प्रहरी बलका सह प्रवक्ता डिएसपी शैलेन्द्र थापाले दिएको जानकारी अनुसार विपद् आइपर्ने सम्भावित स्थानहरूको चयन गरी प्रतिकार्य वेश स्थापना गरिएको हो । डिएसपी थापाका अनुसार अहिले  कोशी प्रदेश अन्तर्गत मोरङको बखरी र ओखलढुंगाको हर्कपुर, मधेस प्रदेशस्थित सप्तरीको भारदह र बर्साईन, सिरहाको मिल, धनुषाको दुवरकोट, महोत्तरीको रघुनाथपुर र बनौटा, सर्लाहीको धरहरा, रौतहटको फतुवा, बाराको तेलकुवा र कलैया, पर्साको पोखरीया, बाग्मती प्रदेशस्थित मकवानपुरको सुनौला, काभ्रेको खालथोक र मंगलटार, नुवाकोटको खरानिटार, चितवनको भालढुंगा, दोलखाको लिङ्कन बजार र सिगंटी तथा रसुवाको तातेपानीमा बेश स्थापना गरिएको छ ।

उनका अनुसार गण्डकी प्रदेश अन्तर्गत पर्वतको खहरे, गोरखाको आरुघाट, पुर्वी नवलपरासीको चोरमारा, कास्कीको छाचोक, लुम्बिनी प्रदेशस्थित बर्दियाको राजापुर, रुपन्देहीको बुटवल, बाँकेको कुण्डा र कचनापुर, गुल्मीको तुराङ्ग र पाल्पाको दोभानमा, कर्णाली प्रदेशस्थित जुम्लाको बड्की, मुगुको डिमुरखारा र जाजरकोटको दल्ली र सुदूपश्चिम प्रदेशस्थित कैलालीको खानी डाडा र डोटीको बुडरमा मनसुन प्रतिकार्य सुरक्षा बेश स्थापना गरिएको छ ।  

‘आपद् विपदमा परेका आम नागरिकहरूको उद्धार कार्यमा सहज होस् भन्ने अभिप्रायकोसाथ सशस्त्र प्रहरी बल नेपालले वर्षाको कारण जोखिमयुक्त क्षेत्रहरूको पहिचान गरी उक्त बेशहरुमा विपद् उद्धार सामाग्रीसहितको सुरक्षा फौज तयारी हालतमा राखिएको हो’, सशस्त्र प्रहरीका डिएसपी एवं सह प्रवक्ता थापाले बताए ।  

यसअघि सशस्त्र प्रहरी बलले विपद् व्यवस्थापनमा स्थानीय समुदायको समेत महत्त्वपूर्ण भूमिका रहने भएकोले देशभरि १ लाख ६८ हजार ९ सय ५६ जना विपद् सूचक तयार गरेको छ ।  जसअन्तर्गत कोशी प्रदेशमा २८ हजार ९ सय जनालाई, मधेस प्रदेशमा ३१ हजार ७ सय ७५ जनालाई, बाग्मती प्रदेशमा २१ हजार ८ सय ५० जनालाई, गण्डकी प्रदेशमा १८ हजार ९ सय ७५ जनालाई, लुम्बिनी प्रदेशमा २४ हजार ५ सय ७५ जनालाई, कर्णाली प्रदेशमा १७ हजार ९ सय ५० जनालाई, सुदूपश्चिम प्रदेशमा १८ हजार २ सय २५ जनालाई र उपत्यकामा ६ सय ७ सय ५ जनालाई विपद् सचेतनामूलक प्रशिक्षण प्रदान गर्नुको साथै सिमुलेशन अभ्यासमा समेत सहभागी गराई आपद् विपदमा परेका नागरिकहरूको उद्धार तथा सहयोगमा सुरक्षाकर्मीसहित कसरी परिचालन हुने भन्ने बारे जानकारी गराइएको थियो ।

उनीहरुले मनसुनको बेला विपदमा परेका आम नागरिकहरूको उद्धारको लागि नजिकै रहेको सशस्त्र प्रहरी बल नेपाललाई जानकारी गराउनसाथ विपद् उद्धार सामाग्रीसहितको सुरक्षा फौज परिचालन हुनेछ ।  

त्यसैगरी देशभर ९ सय ९० जनालाई विपद् स्वयंसेवक अनुशिक्षण तालिम दिइएको छ । जसअन्तर्गत राष्ट्रिय सशस्त्र प्रहरी बल प्रशिक्षण प्रतिष्ठान मातातीर्थले १ सय ८०, सशस्त्र प्रहरी बल नेपाल नं. १ बराह बाहिनी मुख्यालय सुनसरीले ९४, नंं. २ छिन्नमस्ता बाहिनी मुख्यालय महोत्तरीले २ सय २७, नं. ३ गढिमाई बाहिनी मुख्यालय मकवानपुरले ५०, नं. ४ मुक्तिनाथ बाहिनी मुख्यालय कास्कीले १ सय ४३, नं. ५ विन्ध्यावासिनी बाहिनी मुख्यालय रुपन्देहीले २५, नं। ६ महेश्वरी बाहिनी मुख्यालय सुर्खेतले ७३, नं. ७ बैद्यनाथ बाहिनी मुख्यालय कैलालीले १ सय २ र नं। ९ पशुपतिनाथ बाहिनी मुख्यालय काठमाडौँले ९६ जनालाई विपद् स्वयंसेवक तालिम दिएको छ ।  

त्यस्तै सशस्त्र प्रहरी बल नेपालले आफ्नो वेभसाईड मार्फत आपद् विपदमा  परेका नागरिकहरूको तत्काल उद्धार तथा सहयोग गर्नको लागि टोल फ्रि नम्बर १११४ तथा सशस्त्र प्रहरी बल नेपालको कार्यालय तथा कार्यालय प्रमुखहरूको नम्बर समेत उल्लेख गरेको छ । यसबाट विपद्मा परेका नागरिकहरूले तत्कालै उद्धारको लागि सम्पर्क गर्न सकिने डिएसपी थापाले बताए ।