काठमाण्डाैँ । बागमती प्रदेश मन्त्रिपरिषद् समावेशी हुनुपर्ने माग गर्दै नेपाल दलित संघ काठमाडौँ नेपाली कांग्रेसका सभापति शेरबहादुर देउवा निवासमा डेलिगेसन पुगेको छ ।

बिहीबार नेपाल दलित संघ काठमाडौँका अध्यक्ष सुरेश परियारको नेतृत्वको टोली बुढानीलकण्ठ पुगेर सभापति देउवालाई ध्यानाकर्षण गराएको हो ।

सो क्रममा बागमती प्रदेश सरकारमा दलित तथा सिमान्तकृत समुदायको प्रतिनिधित्व गराउन देउवालाई ध्यानाकर्षण गराइएको बुढानीलकण्ठ पुगेका एक नेताले बताए ।

हाल प्रदेशमा कांग्रेस बागमती प्रदेश सभापति इन्द्रबहादुर बानियाँको नेतृत्वमा नयाँ सरकार गठन भएको छ । बानियाँ नेतृत्वको मन्त्रिपरिषदले पूर्णता पाउने चरणमा रहेकाले दलित समुदायको प्रतिनिधित्व हुनुपर्ने उनीहरूको धारणा थियो ।  यसअघिका मन्त्रिमण्डलमा  दलित समुदायलाई नसमेटिएकाले यो पटक भने त्यसो हुन नहुने उनीहरूको धारणा थियो ।

सो क्रममा उनीहरूले हाल गठित बानियाँ नेतृत्वको सरकारले समावेशीताको मुद्दालाई निष्कर्ष दिनेगरी दलित, सीमान्तकृत समुदायको प्रतिनिधित्व सुनिश्चित गर्न र आफ्नो अधिकार प्राप्तिको लागि पहल गरिदिन समेत देउवालाई आग्रह गरेका थिए ।

उक्त भेटमा सभापति देउवाले कांग्रेस समावेशी सहभागिताको एजेन्डाबाट अलग नभएको र सबैलाई न्याय हुनेगरी समावेशी सहभागिताको पहल गर्ने आश्वासन दिए ।

भेटमा कांग्रेस केन्द्रीय सदस्य सुजाता परियारको समेत सहभागिता थियो ।