काठमाडौँ । सरकारले ३ जना सचिवको सरुवा गरेको छ । सोमबार साँझ बसेको मन्त्रिपरिषद् बैठकले विभिन्न मन्त्रालय तथा निकायमा कार्यरत ३ सचिवको सरुवा गरेको हो ।

प्रधानमन्त्री तथा मन्त्रिपरिषद् कार्यालय स्रोतका अनुसार रक्षा मन्त्रालयका सचिव रामेश्वर दंगाललाई गृह सचिवको जिम्मेवारी दिइएको छ भने त्यहाँ कार्यरत सचिव गोकर्णमणी दुवाडीलाई राष्ट्रिय योजना आयोगको सचिवको जिम्मेवारीमा सरुवा गरेको छ ।

दुवाडीले तत्कालिन गृहमन्त्री रमेश लेखक जिम्मेवारीमा आइसकेपछि राष्ट्रिय तथ्यांक कार्यालयबाट सरुवा गरेर मन्त्रालयको सचिवको जिम्मेवारी पाएका थिए । दुवाडी करिव २ महिनापछि आागमी मंसिर १० मा ५ वर्षे सचिवको कार्यकाल पुरा गरेर अनिवार्य अवकाशमा जादैँछन्।

यस्तै, योजना आयोगका सचिव सुमनराज अर्याललाई रक्षा मन्त्रालयको सचिवको जिम्मेवारी दिइएको छ । दंगाल एक वर्ष अघि २०८१ साउनमा अख्तियार दुरुपयोग अनुसन्धान आयोगको सचिवबाट सरुवा भएर रक्षा मन्त्रालयको सचिवको जिम्मेवारीमा आएका थिए ।

योजना आयोगका सचिव अर्यालको भने एक वर्षको अवधिमा ४ पटक सरुवा भएको छ । उनी ६ महिना अघि मात्रै योजना आयोगको सचिवको जिम्मेवारीमा आएका थिए । अर्यालआयोगमा सरुवा भएर आएको ६ महिनामै सरुवा भएको हो । अधिकांश सचिवको कम्तिमा एक वर्षमा सरुवा हुने गरेको भए पनि अर्यालको भने ६ महिनामै सरुवा भएको हो ।

अर्याल योजना आयोगको सचिवको जिम्मेवारीमा आउनु अघि प्रधानमन्त्री तथा मन्त्रिपरिषद्को कार्यालयमा जगेडामा थिए । त्यस अघि उनी युवा तथा खेलकुद मन्त्रालयको सचिवको जिम्मेवारीमा पनि गत वर्ष असोजदेखि पुषसम्म ३ महिना मात्रै बसेका थिए ।