काठमाडौं, ६ मंसिर । नेपाली कांग्रेसका महामन्त्री गगनकुमार थापाले अब विशेष महाधिवेशन नै कांग्रेसको लागि निर्विकल्प भएको बताएका छन् । केन्द्रीय समितिको बैठक सकिएलगत्तै पार्टी कार्यालयबाट निस्किने क्रममा थापाले यस्तो प्रतिक्रिया दिएका हुन् ।

उनले नियमित महाधिवेशनका लागि आफूले केन्द्रीय समितिमा कार्यतालिका सहित प्रस्ताव पेश गरेको तर नेताहरूले सकिन्न भनेको हुँदा अब विशेष महाधिवेशन निर्विकल्प भएको बताएका हुन् । उनले भने,‘आज हामीले चुनावमा जाने निर्णय गरेका छौं । चुनावमा जाने उत्तम विकल्प के हो भने जुन दिन विशेष महाधिवेशन गर्न उपयुक्त हुन्छ । त्यो दिन कांग्रेसको विशेष महाधिवेशन गर्नुपर्दछ ।’

महामन्त्री थापाले पार्टी पूनर्गठन नगरी चुनावमा जान नसकिने मत राख्दै आएका छन् । तर, संस्थापनपक्ष चुनावअघि कुनैपनि हालतमा महाधिवेशन गर्न सकिँदैन भनिरहेको छ । File Photo