काठमाडौं, ८ मंसिर । कर्मचारी नियुक्तिको कारण विवादमा तानिएको प्रधानमन्त्री सुशीला कार्कीको सचिवालयले विज्ञप्ति जारी गर्दै विषयमाथि प्रष्ट पारेको छ । प्रधानमन्त्री कार्कीको सचिवालयले आएका समाचारहरुका सत्यता नभएको दाबी गरेको छ ।

प्रधानमन्त्री कार्कीका प्रमुख स्वकीय सचिव आदर्शकुमार श्रेष्ठले सचिवालयमा आफ्ना मान्छे (श्रीमतीलगायत) लाई नियुक्त गरेको भनी विभिन्न सञ्चार माध्यमहरुको समाचार आएको थियो । प्रकाशित–प्रसारित समाचारलाई लिएर सचिवालयको गम्भीर ध्यानाकर्षण भएको बताइएको छ ।

प्रधानमन्त्री कार्कीले पारदर्शिता र जवाफदेहिताका सन्दर्भमा जिम्मेवार र संवेदनशील रही सोहीअनुरुपको आचरण र व्यवहार गर्दै आएको विज्ञप्तिमा उल्लेख छ । राज्यकोषमा कमभन्दा कम भार परोस् र छरितो रुपमा काम गर्न सकियोस् भनेर निकै कम जनशक्तिबाट प्रधानमन्त्रीको सचिवालय चलन हुँदै आएको विज्ञप्तिमा उल्लेख छ ।

कानुनसम्मत नियुक्तिलाई लिएर प्रश्न उठाई अन्यथा व्याख्या नगर्न पनि प्रधानमन्त्रीको सचिवालयले आग्रह गरेको छ । ‘नियुक्तिहरुमा प्रमुख स्वकीय सचिवलाई लान्छना लगाई अनावश्यक रुपमा जोडिएको र कतै घर र कतै जातीय पृष्ठभूमि मिलेकै आधारमा जबरजस्ती नातेदार भनी प्रचार गरिएको देखिएकोले त्यसो नगरिदिनहुन पनि अनुरोध छ,’– विज्ञप्तिमा भनिएको छ ।

जेन–जी आन्दोलनमा शहीद भएका परिवार र घाईतेलाई दिने भनिएको जागिरमा प्रमुख स्वकीय सचिव आदर्शले आफ्नी श्रीमती संगिता श्रेष्ठ र नातेदारलाई जागिर खुवाएको खुल्न आएको थियो ।