दमक । काठमाडौं महानगरपालिकाका पूर्वमेयर तथा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह (बालेन) झापा–५ बाट उम्मेदवार बनेका छन् । आज उनले त्यहाँ मनोनयन दर्ता गरेका हुन् ।

सयौँ समर्थकको साथमा मंगलबार निर्वाचन कार्यालय पुगेका उनलाई नाराबाजी र झाँकीसहित स्वागत गरिएको थियो, जसले यस क्षेत्रको चुनावी माहोल थप उत्साहित बनाएको छ ।

झापा–५ मा बालेनको उम्मेदवारीले चुनावी प्रतिस्पर्धा केवल स्थानीय स्तरमा सीमित नरही राष्ट्रिय राजनीतिक बहससँग जोडिएको देखिन्छ । किनकी यो निर्वाचन क्षेत्रमा एमाले अध्यक्ष तथा पूर्वप्रधानमन्त्री केपी शर्मा ओली पनि उम्मेदवार छन् । ओलीसँग बालेनको कडा प्रतिस्पर्धा हुने अनुमान गरिएको छ । 

उता, नेकपाले पनि झापा–५ मा पूर्व विद्यार्थी नेता रञ्जित तामाङलाई उम्मेदवार बनाएपछि प्रतिस्पर्धा त्रिकोणात्मक बनेको छ । यसले मत विभाजनको सम्भावना बढाउनुका साथै दलहरूलाई आफ्नो एजेन्डा र संगठनात्मक क्षमता अझ बलियो रूपमा प्रस्तुत गर्न दबाब सिर्जना गरेको छ ।

समग्रमा, बालेनको उम्मेदवारीले झापा–५ लाई केवल एउटा निर्वाचन क्षेत्रभन्दा बढी, राष्ट्रिय राजनीतिक दिशाको संकेत दिने केन्द्रका रूपमा उभ्याएको छ । यो चुनाव केवल उम्मेदवार जित्ने वा हार्ने विषय होइन, नयाँ र पुरानो राजनीतिक धारबीचको विश्वास परीक्षणका रूपमा पनि हेरिएको छ ।