काठमाडौँ  । प्रतिनिधिसभा निर्वाचन नजिकिँदै गर्दा राजनीतिक दलका केही नेताहरू र उम्मेदवारहरूबीच अमर्यादित र घृणाजनक अभिव्यक्ति देखिन थालेपछि राष्ट्रिय मानव अधिकार आयोगले गम्भीर चेतावनी जारी गरेको छ। आयोगको यो कदम उम्मेदवारहरूको लापरबाही र जिम्मेवारीहीन व्यवहारलाई ध्यानमा राखेर आएको हो।

आयोगका प्रवक्ता डा टीकाराम पोखरेलका अनुसार, विचार र अभिव्यक्तिको स्वतन्त्रता भए पनि अरूको मर्यादा र समाजको शान्ति सुरक्षामा असर पर्ने खालका भाषण अस्वीकार्य छन्। विगतका केही दिनयता फैलिएका घृणायुक्त अभिव्यक्तिले निर्वाचनको वातावरण असुरक्षित बनाउन सक्ने, समाजमा विभाजन ल्याउने र लोकतान्त्रिक मूल्य कमजोर पार्ने जोखिम बढाएको आयोगको ठहर छ।

यसै कारण आयोगले राजनीतिक दलका नेता, उम्मेदवार र सर्वसाधारणलाई सामाजिक सञ्जालमा शिष्ट र मानव अधिकारमैत्री भाषा प्रयोग गर्न, घृणाप्रचार नगर्न र निर्वाचन आचारसंहिताको पूर्ण पालना गर्न निर्देशन दिएको छ। साथै, आयोगले सरकारलाई पनि शान्ति सुरक्षालाई मजबुत बनाउन आवश्यक कदम चाल्न सचेत गराएको छ।

आयोगको यो चेतावनी स्पष्ट रूपमा उम्मेदवारहरूको लापरबाहीप्रति प्रतिक्रिया हो। चुनावी प्रतिस्पर्धामा हिंसा र घृणाप्रचार रोक्न उनीहरूले आफ्नो जिम्मेवारी निभाउन सकेका छैनन्। आयोगले सार्वजनिक चेतावनी जारी गरेर उम्मेदवारहरूलाई कानुनी र नैतिक दायित्व सम्झाइरहेको छ र शान्तिपूर्ण निर्वाचन सुनिश्चित गर्न सरकारलाई पनि कदम चाल्न प्रेरित गरेको छ।